Forseti ASÍ kærir Eyjuna til Blaðamannafélagsins

Gylfi Arnbjörnsson, forseti ASÍ, ætlar að kæra fréttaflutning Eyjunnar til Siðanefndar Blaðamannafélagsins.

Gylfi hefur sent frá sér yfirlýsingu með yfirskriftinni: „Vísvitandi rangfærslur ritstjóra Eyjunnar" þar sem hann segir að í frétt á Eyjunni hafi orð hans um skuldir heimilanna verið rangtúlkaðar. Þegar Gylfi leitaði eftir því að rangfærslurnar yrðu leiðréttar hafi ritstjóri Eyjunnar, Þorfinnur Ómarsson, hins vegar neitað því.

Yfirlýsing Gylfa:

„Á vefsíðunni Eyjan.is var sett inn frétt að kvöldi 14. október með fyrirsögninni „Forseti ASÍ eindregið gegn því að skuldir heimilanna verði lækkaðar". Var í þessari svokölluðu frétt lagt út af orðum Gylfa Arnbjörnssonar forseta ASÍ sem hann viðhafði í kvöldfréttum Sjónvarpsins þetta sama kvöld. Þar sagði Gylfi að hvorki hann né aðrir hefðu umboð til að nota lífeyrissparnað fólks til niðurfærslu almennra skulda.

Út af þessum orðum leggur Þorfinnur Ómarsson ritstjóri Eyjunnar að forseti ASÍ sé eindregið á móti því að skuldir heimilanna verði lækkaðar. Sú fullyrðing er auðvitað alger fjarstæða enda hefur ASÍ barist fyrir því að tryggja lagalega stöðu þeirra sem verst hafa orðið úti í þessu efnahagshruni þannig að skuldir verði afskrifaðar á grundvelli greiðslu- og eignarstöðu almennings. ASÍ setti slíkar tillögur reyndar fyrst fram árið 1996. Þá er skemmst er að minnast sérstakrar herferðar sem ASÍ fór í febrúar og mars á þessu ári undir yfirskriftinni „ASÍ krefst..." þar sem áherslan var sett á „rétt fólksins, ekki rukkaranna" til að hnykkja á baráttunni fyrir lækkun skulda þeirra sem verst standa. Á þetta var ritstjóra Eyjunnar góðfúslega bent, auk þess sem ritstjóranum var bent á að Gylfi hefði aldrei lagst gegn lækkun skulda heimilanna heldur þvert á móti barist fyrir slíkum aðgerðum. Þrátt fyrir þetta neitaði Þorfinnur Ómarsson að leiðrétta fréttina. Alþýðusambandið mun því kæra fréttaflutninginn til Siðanefndar Blaðamannafélags Íslands.

Varðandi efni fréttar Sjónvarpsins sem Eyjan afflutti er rétt að hafa í huga. Þeir sem tala fyrir því að farin verði leið almennrar skuldaniðurfærslu virðast ganga út frá því að sá kostnaður verði borinn uppi af eldra fólki og öryrkjum úr hópi almenns launafólks, hópum sem nú þegar hafa þurft að taka á sig mikla lífskjararýrnun vegna fjármálahrunsins í formi skerðingar á lífeyrisgreiðslum og frystingu á bótum almannatrygginga. Talsmenn tillagnanna og forsvarsmenn ríkisstjórnarinnar tala með þeim hætti að ekkert sé athugavert við að ráðstafa þeim sparnaði sem almennt launafólk leggur til hliðar af tekjum sínum, til að standa straum af kostnaði við almenna niðurfærslu skulda. Lífeyrissjóðirnir eru eingöngu vörsluaðilar sem ætlað er að ávaxta lífeyrissparnað almenns launafólks og greiða þeim sem í hann hafa lagt út lífeyrir. Sjóðirnir hafi engar heimildir til þess að ráðstafa þessum sparnaði með neinum öðrum hætti."