Umfjöllun: Dramatískur sigur Hauka

Haukar eiga enn von um að bjarga sæti sínu í Pepsi-deild karla eftir 2-1 dramatískan sigur á Fram á Vodafone-vellinum í dag.

Sigurmark leiksins kom á fjórðu mínútu uppbótartímans er varamaðurinn Hilmar Trausti Arnarsson skoraði af stuttu færi eftir hornspyrnu. Bæði lið höfðu sótt nokkuð stíft lokamínútur leiksins og freistuðu þess að klófesta öll stigin þrjú sem í boði voru.

Haukar tefldu nokkuð djarft á lokamínútum leiksins og það borgaði sig í þetta skiptið. Loksins voru lukkudísirnar á þeirra bandi en það er þó enn langt í land fyrir þá rauðklæddu. Þrátt fyrir stigin þrjú í kvöld eru Haukar enn þremur stigum á eftir Grindavík og fjórum á eftir Fylki.

Það þýðir að Haukum mun líklegast ekki duga sigur gegn Fylki á sunnudag þegar liðin mætast til að bjarga sæti sínu í deildinni. Þeir þurfa að treysta á að úrslit annarra leikja í síðustu tveimur umferðunum verði þeim hagstæð.

Leikurinn í kvöld var afar lengi að komast almennilega í gang og gerðist í raun ekkert markvert í fyrri hálfleik.

Framarar komu miklu beittari í síðari hálfleikinn og uppskáru mark á 53. mínútu. Ívar Björnsson var þar að verki eftir að hafa fylgt eftir eigin skalla sem hafnaði í stönginni eftir laglegan undirbúning Sam Tillern.

Eftir þetta róðist leikurinn nokkuð og Haukar unnu sig betur inn í leikinn. Það gerðist þó ekki mikið hjá þeim fyrr en þeir fengu vítaspyrnu þegar um 20 mínútur voru til leiksloka. Hún var dæmd eftir að Guðjón Pétur Lýðsson skaut boltanum í hendi varamannsins Jóns Orra Ólafssonar. Arnar Gunnlaugsson skoraði örugglega úr henni.

Sem fyrr segir voru síðustu mínútur leiksins afar fjörlegar. Bæði lið sóttu stíft og þegar vel var liðið á uppbótartímann komst Magnús Björgvinsson, varamaður Hauka, í gott skotfæri eftir undirbúning Úlfars Hrafns Pálssonar. Skot hans var bjargað í horn en upp úr því skoraði Hilmar Trausti sigurmarkið dýrmæta.

Hvort þetta mark eigi eftir að verða til þess að Haukar haldi áfram á þessari braut og komi sér upp úr fallsæti áður en mótinu lýkur verður að koma í ljós. Líklegt er þó að þeir verði að spila nokkuð betur en þeir gerðu lengst af í kvöld til að svo verði.

Haukar - Fram 2-1

0-1 Ívar Björnsson (53.)

1-1 Arnar Gunnlaugsson, víti (71.)

2-1 Hilmar Trausti Arnarsson (94.)

Vodafone-völlurinn. Áhorfendur: 402.

Dómari: Valgeir Valgeirsson (6)



Skot (á mark): 8-14 (3-4)

Varin skot: Daði 3 - Hannes 1

Horn: 4-7

Aukaspyrnur fengnar: 13-12

Rangstöður: 2-1

Haukar (4-3-3):

Daði Lárusson 7 - maður leiksins

Grétar Atli Grétarsson 6

Daníel Einarsson 5

Jamie McCunnie 7

Kristján Ómar Björnsson 5

Ásgeir Þór Ingólfsson 5

Guðjón Pétur Lýðsson 6

Arnar Gunnlaugsson 6

Hilmar Geir Eiðsson 4

(86. Hilmar Trausti Arnarsson -)

Úlfar Hrafn Pálsson 7

Hilmar Rafn Emilsson 4

(66. Magnús Björgvinsson 5)

Fram (4-5-1):

Hannes Þór Halldórsson 6

Daði Guðmundsson 6

(86. Hlynur Atli Magnússon -)

Kristján Hauksson 5

Jón Guðni Fjóluson 6

Sam Tillen 7

Tómas Leifsson 3

(65. Jón Orri Ólafsson 4)

Halldór Hermann Jónsson 6

Jón Gunnar Eysteinsson 5

Joe Tillen 7

Almarr Ormarsson 4

Ívar Björnsson 5

(86. Guðmundur Magnússon -)

Smelltu hér til að opna Boltavaktina og lesa lýsingu leiksins:Haukar - Fram