Sorpstöðin kærð og sökuð um getuleysi

Íslenska gámafélagið hefur kært Sorpstöð Suðurlands fyrir brot á bæði samkeppnislögum og stjórnsýslulögum.

Jón Frantzson, forstjóri Íslenska gámafélagsins, segir í grein í Sunnlenska fréttablaðinu að aðgerðarleysi Sorpstöðvarinnar í að finna nýjan sorpurðunarstað hafi í för með sér gríðarlegan kostnaðarauka fyrir íbúa og fyrirtæki á starfssviði stöðvarinnar. Eftir að Íslenska gámafélagið (ÍG) hafi kært Sorpstöðina fyrir meinta ólöglega samkeppni hafi sveitarfélagið Árborg sagt upp sammingi um sorphirðu við ÍG.

„Við kærðum Sorpstöð Suður­lands og Sorpu fyrir samning sem þessir aðilar gerðu sín á milli til samkeppniseftirlitsins og til ráðuneytis sveitarstjórnarmála. Þeir gera samning sín á milli um að úrgangur sem fellur til á Suðurlandi komi til urðunar á Álfsnesi. Það sem við finnum að er lítil klausa um að Sorpstöð Suður­lands verði að koma með allan endurvinnanlegan úrgang af svæðinu líka til Sorpu, annars fái þeir ekki að urða,“ útskýrir Jón fyrir Fréttablaðinu.

ÍG hefur einmitt verið að reisa umhleðslustöð fyrir endurvinnanlegan úrgang og hugðist nýta það sem til fellur á Suðurlandi. Þrjú sveitarfélög á svæðinu hafi samning við ÍG um að selja fyrirtækinu allan endurnýjanlegan úrgang. „Það átti að neita þeim um að urða ruslið í Álfsnesi. Niður­staðan var sú að það var lagður á 321 krónu nefskattur á hvern íbúa þessara sveitarfélaga svo þau fái að urða í Álfsnesi. Þarna er verið að refsa þeim þremur sveitarfélögum á Suðurlandi sem er langlengst komin í að flokka úrgang,“ segir forstjóri ÍG.

Jón er afar gagnrýninn á að Sorpstöð Suðurlands skuli ekki hafa brugðist við fyrirsjáanlegri lokun urðunarstaðar í Kirkjuferjuhjáleigu hinn 1. desember síðastliðinn. Lokunin hafi verið löngu ljós.

„Samt sem áður var getuleysi þeirra sem fóru með málefni Sorpstöðvar Suðurlands slíkt að ekkert var búið að gera í málinu og engar lausnir búið að kanna og fyrir þau mistök þurfum við að greiða með dýrustu urðunargjöldum á landinu og flutningum yfir Hellisheiði,“ skrifar Jón í Sunnlenska fréttablaðið. Hann kveður nýja fyrirkomulagið hafa allt að sexfaldað urðunarkostnað fyrirtækja á Suðurlandi. Ekki náðist í gær í Guðmundur Tr. Ólafsson, framkvæmdastjóra Sorpstöðvar Suðurlands. gar@frettabladid.is