Ólafur: Ungu strákarnir með mikið sjálfstraust

Ólafur Jóhannesson landsliðsþjálfari hrósaði þeim ungu leikmönnum sem hafa verið að gera það gott með bæði U-21 og A-landsliði Íslands.

Ísland mætir Danmörku í kvöld og þar munu margir ungir leikmenn fá tækifærið, rétt eins og gegn Noregi í síðustu viku.

„Kosturinn við þessa stráka ef við berum þá saman við marga aðra leikmenn þegar þeir voru á sama aldrei fyrir nokkrum árum síðan er að þeir eru allir fastamenn í sínum liðum. Kolbeinn [Sigþórsson, leikmaður AZ Alkmaar] er í raun sá eini sem ekki er byrjunarliðsmaður en hann hefur verið 12.-13. maður í sínu liði."

„Þessir strákar eru með mikið sjálfstraust og þar af leiðandi betri fótboltamenn. Maður verður ekki betri fótboltamaður á að sitja á varamannabekk hjá stórliði og horfa á þá spila fótbolta um hverja helgi. Stundum þurfa því kannski menn að taka eitt skref aftur á bak til að komast áfram."

„Ég held að þessir ungu strákar séu á góðum stað á sínum ferli og það mun hjálpa landsliðinu."

Hann segir að það hafi ekki komið sér á óvart hversu vel þeir virðast hafa aðlagast A-landslðinu.

„Nei, vegna þess að þeir hafa verið með okkur áður. Eggert var til að mynda valinn í liðið þegar við spiluðum hér fyrir þremur árum. Þá hafði ég aldrei séð hann spila. Hið sama má segja um Arno. Þegar ég valdi hann fyrst hafði ég ekki heldur séð hann spila. En þeir eru nú búnir að vera með í þrjú ár."

Gylfi Þór Sigurðsson hefur átt sterka innkomu í íslenska landsliðið en hann gekk nýverið í raðir þýska úrvalsdeildarfélagsins Hoffenheim. Ólafur sér ekki eftir því að hafa ekki valið hann fyrr í landsliðið.

„Nei, alls ekki. Gylfi spilaði fyrsta sinn sem fastamaður í sínu liði [Reading í England] á síðasta tímabili og stóð sig mjög vel. Þess vegna var hann valinn. Fram að þeim tíma hafði hann ekki spilað með nema varaliðum og unglingaliðum."