Ofkældist klæddur í leðurjakka og gallabuxur

Björgunarsveitin á Hellu bjargaði ungum karlmanni sem hafði gengið upp að Baldvinsskála klæddur í strigaskó, leðurjakka og gallabuxur, en hann reyndist vera með merki um ofkólnun. Formaður Flugbjörgunarsveitar Hellu, Svanur S. Lárusson, sagðist ekki búast við því að maðurinn yrði sendur á spítala með sjúkrabíl.

Á leiðinni niður sótti björgunarsveitin tvo aðra einstaklingar sem voru mjög illa búnir á leiðinni upp Fimmvörðuhálsinn. Þá hafði gönguhópur stöðvað för fólksins þar sem það var sérstaklega illa búið.

Björgunarsveitin vill koma því til fólks að veðrið á Skógum, sem er mjög gott, er ekki sambærilegt við veðrið sem er upp á Fimmvörðuhálsi. Þá eru göngumenn komnir í þúsund metra hæð og kuldinn gríðarlegur. Auk þess sem allra veðra von er á svæðinu. Því biður björgunarsveitin fólk um að vera ekki að fara upp hálsinn sé það ekki vant fjallgöngum.