Þjálfari Lyon: Ýmislegt hægt með svona markvörð

Hugo Lloris, markvörður Lyon, átti stórleik þegar liðið tapaði 1-0 fyrir Bordeaux í seinni leik liðanna í átta liða úrslitum Meistaradeildarinnar.

Lyon komst áfram 3-2 samanlagt úr leikjunum tveimur milli þessara frönsku liða. „Hugo varði það sem verja þurfti. Hann var frábær í báðum leikjunum gegn Bordeaux," segir Claude Puel, þjálfari Lyon.

„Enn einu sinni átti hann stórleik fyrir okkur. Með svona magnaðan markvörð er ýmislegt hægt," sagði Puel en hans menn mæta þýska liðinu FC Bayern í undanúrslitunum.

„Það er mjög mikilvægt fyrir félagið og leikmenn að komast svona langt í keppninni. Bayern var að slá út Manchester United og er vant því að spila stórleiki í Evrópukeppni svo þetta verður erfitt en við verðum tilbúnir."