Njósnaði Rúnar um norska landsliðið?

Norskir fjölmiðlar halda því fram að Rúnar Kristinsson, þjálfari KR, hafi njósnað um norska landsliðið fyrir Ólaf Jóhannsson landsliðsþjálfara á lokaðri æfingu í gær.

Þetta kom fram í frétt norsku sjónvarpsstöðvarinnar TV2 í gær.

Norska landsliðið æfði á Laugardalsvelli í gær og var æfingin lokuð, fyrir utan fyrstu 20 mínúturnar.

Samkvæmt fréttinni mun Rúnar Kristinsson hafa fylgst með æfingunni í útsendingarhólfi Rúv í stúkunni þar sem einnig var búið að koma fyrir upptökuvél.

„Ég sá til liðsins," sagði Rúnar brosandi í samtali við TV2 í gær.