Ný skýrsla: Auðvelt að vera móðir á Íslandi

Noregur er í fyrsta sæti á lista yfir þau lönd þar sem auðveldast er að vera móðir, samkvæmt skýrslu Barnaheilla - Save the Children „State of the World's Mothers Report" fyrir árið 2010. Ísland er í þriðja sæti á eftir Ástralíu, en Ísland færist upp um um eitt sæti frá fyrra ári. Afganistan er í neðsta sæti.

Í fréttatilkynningu frá Barnaheillum á Íslandi kemur fram að mæður í Noregi og Ástralíu eigi auðveldast með að sinna móðurhlutverkinu, samkvæmt hinni svokölluðu „vísitölu mæðra" sem Barnaheill hefur gefið út í ellefta sinn. Með vísitölunni er löndum heims raðað niður eftir því hvar er auðveldast og hvar er erfiðast að vera móðir. Á listanum eru 160 ríki. Þar af eru 43 vestræn ríki og 117 þróunarríki.

Meðal þess sem litið er til eru líkurnar á því að mæður látist af barnsburði, hlutfall fæðinga þar sem mæður njóta faglegrar hjálpar heilbrigðisstarfsmanna, hlutfall kvenna sem nota nútímalegar getnaðarvarnir, lífslíkur kvenna við fæðingu, fjöldi ára þar sem konur geta sótt sér formlega menntun, hlutfall tekna kvenna samanborið við karlmenn og þátttaka kvenna í stjórnun ríkja. Þá er einnig litið á hverjar lífslíkur barna eru við fæðingu, hlutfall barna undir fimm ára aldri sem eru vannærð auk þess sem aðgengi að menntun og hreinu vatni er skoðað.



Mikilvægt að veita konum menntun



Í skýrslu Barnaheilla, „State of the World's Mothers Report" fyrir árið 2010 þar sem „vísitala mæðra" er kynnt, kemur fram hversu gríðarlega mikilvægt það er að veita mæðrum aðgang að menntun, fjárhagslegum tækifærum og heilsuvernd, bæði fyrir þær og börn þeirra. Það er líklegast til að tryggja að þau vaxi og dafni. Mikilvægur liður í þessu starfi er þátttaka kvenna í heilsuvernd um allan heim.

„Auðvitað væri best ef hver ófrísk kona og hvert veikt barn hefðu tækifæri til að vera undir læknishendi á heilsugæslustöðvum. Því fer því miður fjarri í fátækari löndum heims. En með tiltölulega litlum tilkostnaði í grunnþjálfun, eftirliti og stuðningi, geta kvenkyns heilbrigðisstarfsmenn komið á framfæri ódýrum heilbrigðisráðum sem hafa sannað ágæti sitt og þannig bjargað milljónum barna á hverju ári," segir Petrína Ásgeirsdóttir, framkvæmdastjóri Barnaheilla á Íslandi.