Borgarstjórn ætlar að draga úr umferðarhraða

Borgarstjórn Reykjavíkur samþykkti einróma á fundi sínum í dag tillögu borgarfulltrúa Framsóknarflokks og Sjálfstæðisflokks um aðgerðir til að draga úr umferðarhraða í hverfum borgarinnar. Með aðgerðunum er ætlunin að fækka umferðarslysum og auka öryggi vegfarenda.

Þá segir í tilkynningu frá Hönnu Birnu Kristjánsdóttur, borgarstjóra:

Umferðarslysum í hverfum borgarinnar hefur fækkað verulega síðan ákveðið var að skilgreina íbúðahverfi sem 30 km hverfi. Enn eru hins vegar svæði þar sem umferðarhraði setur gangandi og hjólandi vegfarendur í mikla hættu. Götur með 50 km/klst. hámarkshraða skera sums staðar í sundur skólahverfi eða svæði íþróttafélaga og gera það að verkum að foreldrar treysta sér ekki til að senda börn sín gangandi úr skóla í frístundir. Borgaryfirvöldum hafa borist ítrekaðar óskir frá foreldrafélögum og íþróttafélögum um að gerðar verði úrbætur á því.

Með þessum aðgerðum verður því komið til móts við þær óskir og á að draga úr umferðarhraða í hverfunum. Í samþykktri tillögu segir að gönguleiðir barna á leið í skóla eða tómstundir skulu sérstaklega skoðaðar og gerðar áætlanir um að lækka hámarkshraða á götum enn frekar þar sem börnin þurfa að komast yfir, annað hvort með bættri hönnun, skilgreiningu á vistgötu eða öðrum aðferðum.

Forritun gönguljósa verði breytt í því skyni að auðvelda börnum og öðrum gangandi vegfarendum að komast leiðar sinnar örugglega. Þannig skulu ljósin stöðva bílaumferð þegar ýtt er á gönguljósahnappinn en ekki láta gangandi vegfarendur bíða eftir samstillingu ljósa fyrir bílaumferð.

Með lægri umferðarhraða skapast betri skilyrði fyrir sjálfbær samfélög í hverfunum, þar sem fjölbreyttir ferðamátar fara saman og bílaumferð tekur tillit til þeirra sem gangandi eru eða hjólandi. Umhverfið verður einnig meira aðlaðandi þar sem lægri umferðarhraði dregur úr hávaða og svifryksmengun. Umhverfis- og samgönguráði og -sviði hefur verið falið að annast framkvæmd verkefnisins.