Sneijder: Einstakt að komast í úrslit á HM

"Þetta er algjörlega ótrúlegt. Þetta var virkilega erfiður leikur en ég er himinlifandi með sigurinn. Við gáfum fullmikið eftir í lokin og Úrúgvæ var ekki fjarri því að jafna," sagði Hollendingurinn Wesley Sneijder eftir leikinn í kvöld.

"Það var fyrir öllu að vinna leikinn. Öllum er sama um hvernig það er gert. Það mun taka tíma að átta sig á því að við séum komnir í úrslitaleikinn."

Sneijder vann þrjá stóra titla með Inter og getur bætt fjórða titlinum við á aðeins 67 dögum á sunnudag.

"Það gekk virkilega vel með Inter í vetur. Það er alltaf spennandi að spila úrslitaleik og það var mín stærsta upplifun að komast í úrslitaleik Meistaradeildarinnar. Úrslitaleikur HM slær þó allt út.

"Við erum svo nálægt því að vinna mótið núna. Við munum njóta augnabliksins áður en við förum að hugsa um úrslitaleikinn."