Breytti áætlun vegna snjóleysis

„Það lá alltaf fyrir að það myndi ráðast af snjólögum hversu langt ég kæmist,“ segir Einar Stefánsson, sem kom til byggða í gærkvöldi eftir fimmtán daga á hálendinu. Hann lagði upp frá Öxi á Austurlandi og ætlaði á þremur vikum að fara á gönguskíðum yfir Ísland endilangt og enda för sína í Hrafnsfirði á Vestfjörðum.

„Það lá fyrir að það yrði allt snjólaust fyrir vestan svo ég fór yfir Langjökul í staðinn og niður í Húsafell og endaði ferðina þar,“ segir Einar. Hann segist hafa verið mjög óheppinn með veður. Það hafi rokið í fangið flesta dagana með skafrenning og snjókomu í kaupbæti.

Það vekur athygli að Einar hefur ekki stigið á gönguskíði í þrjá áratugi. Hann gerir þó lítið úr ferðalaginu og segir fjölda manns á ferð um hálendið að vetrar­lagi og fátt sérstakt við það.

Einar þakkar félögum sínum, sem hann kallar bakvarðasveitina og gættu öryggis hans með því að vera í stöðugu sambandi meðan á ferðinni stóð. - shá