Félagsbústaðir tóku milljarða gengistryggt kúlulán

Félagsbústaðir tóku gengistryggt kúlulán árið 2007, sem stendur í tæpum milljarði króna með gjalddaga í ár. „Óskynsamlegt, eftir á að hyggja," segir framkvæmdastjórinn.

Fréttastofa hefur undanfarið birt viðtöl við fólk í fullri vinnu en á lágum launum sem telur sig vart hafa efni á því að leigja félagslegar íbúðir hjá Reykjavíkurborg.

Félagsbústaðir sjá um að reka allar félagslegar íbúðir í Reykjavík og er alfarið í eigu borgarinnar. Framkvæmdastjórinn segir útilokað að lækka leiguna.



Funda með Íslandsbanka

En hvernig skyldi standa á því? Félagsbústaðir keyptu íbúðir fyrir fimm milljarða króna á hápunkti fasteignabólunnar, 2007 og 2008 - og á í dag nær eina af hverjum 20 íbúðum í borginni. Fyrirtækið hefur tapað milljörðum á rekstrinum síðustu ár en vandinn í dag er hins vegar skammtíma gengislán sem félagið tók árið 2007 sem stendur nú í nærri milljarði króna með gjalddaga í desember. Félagið á fund með Íslandsbanka í næstu viku til að semja um lánið.

Framkvæmdastjóri Félagsbústaða vonast til að hægt verði að borga lánið upp með því að selja 60 íbúðir í Fellahverfi á næstu 3-4 árum. Hann segir jafnframt að Félagsbústöðum hafi verið skylt að fjölga íbúðum í samræmi við stefnu borgarinnar. Eftir á að hyggja hafi það hins vegar verið óskynsamlegt að safna íbúðum á þessu tíma og fjármagna að hluta með gengisláni.



Kerfið skoðað

Jón Gnarr, borgarstjóri, segist ekki þekkja málið það vel til að geta svarað því hvort hann telji að félagslega íbúðakerfið í Reykjavík virki sem skyldi.

Leigjendur félagslegra íbúða hafa gagnrýnt að leigan sé nánast jafnhá því sem gengur á almennum markaði. „Það segir okkur náttúrulega að það er eitthvað að," segir Jón.

Hann segir að það hafi ekki verið ákveðið hvort kerfinu verði breytt en það verði skoðað.