Gunnlaugur: Óska eftir vinnufriði fyrir liðið

„Maður vissi ekki hvernig liðið myndi koma undan þessari orrahríð en maður vonaði að maður gæti notað þetta í að mótivera menn. Sú von varð að veruleika," sagði Gunnlaugur Jónsson, þjálfari Valsmanna, eftir sigur á Selfossi í gær.

Mikið hefur gustað á Hlíðarenda að undanförnu og óvissa ríkt um framtíð Gunnlaugs. En er óvissutímanum lokið hjá Val? „Ég ætla rétt að vona það. Það er nóg komið af þessari umræðu og ég óska eftir vinnufriði fyrir liðið að klára þetta mót. Það eru fjórir leikir eftir og svo verður bara að koma í ljós hvað gerist," sagði Gunnlaugur.

Eftir að fréttastofa Ríkissjónvarpsins greindi frá því að Gunnlaugur væri valtur í sessi og Valsmenn hefðu rætt við Guðjón Þórðarson um að taka að sér þjálfun liðsins urðu stjórnarskipti innan knattspyrnudeildar. Sagt var að Gunnlaugi hafi verið boðið að segja af sér fyrir stjórnarskiptin.

Gunnlaugur vildi ekki tjá sig um hvort það væri rétt. „Nei, ég held að búið sé að segja nóg í því máli. Hvort það verði staður eða stund til að ræða það síðar á eftir að koma í ljós," sagði hann.

Þeir fjórir menn sem létu af stjórnarstörfum sendu frá sér yfirlýsingu þar sem þeir þökkuðu mörgum fyrir samstarfið. Það stakk í augun að öllu þjálfarateymi Vals var þakkað að undanskildum Gunnlaugi Jónssyni. „Ég vil ekkert tjá mig um það," sagði Gunnlaugur þegar hann var spurður hvort það hafi komið sér á óvart.

Gunnlaugur var ánægður með hvernig liðið brást við umræðunni. „Við hleyptum þessu í óþarfa spennu í lokin en við sýndum góða spilamennsku, þá sérstaklega í fyrri hálfleiknum. Mér fannst liðið frábært þá," sagði Gunnlaugur.„Við eigum í næstu leikjum lið sem eru í kringum okkur og við förum að sjálfsögðu í þá til að vinna. Við reynum að klifra eins hátt og við getum. Þetta er mjög jafnt mót."