Síðasta mannlega bensínstöðin mun starfa áfram

Skeljungur hefur hætt við að loka bensínstöðinni í Skógarhlíð, skammt fyrir ofan slökkvistöðina. Ákveðið hafði verið að loka henni á sunnudaginn, samkvæmt upplýsingum frá Einari Erni Ólafssyni, forstjóra Skeljungs.

Einar segir að stöðin og þeir Guðmundur og Loftur, starfsmenn hennar, hafi fengið stuðning sem stjórnendur Skeljungs séu snortnir af. Því sé Skeljungur reiðubúinn að gera frekari tilraun með að þarna geti þrifist rekstur sem staðið geti undir sér.

Þórhallur Óskarsson leigubílstjóri sagði í samtali við Vísi í gær að um væri að ræða eina af síðustu mannlegu bensínstöðunum sem hægt er að finna á höfuðborgarsvæðinu. „Þetta er svona lítil félagsmiðstöð auk þess sem starfsmennirnir þarna, Loftur og Guðmundur, hafa starfað í áratugi á stöðinni," sagði Þórhallur í samtali við Vísi í gær.