Skottur selja kynjagleraugu

Stígamót og Skotturnar, samstarfsvettvangur íslensku kvennahreyfingarinnar, efna til mikils söfnunarátaks sem hefst í dag.

Er átakið í kjölfar þess að loka þurfti þjónustumiðstöðvum Stígamóta utan höfuðborgarsvæðisins vegna niðurskurðar, en þjónusta á Egilsstöðum, Vestmannaeyjum, Selfossi, Borgarnesi, Akranesi og Grundarfirði lagðist af.

„Það var alveg hræðilegt að klippa á þá vinnu sem var í gangi. Við erum þegar að fara af stað aftur, treystandi á fjármagn,“ segir Guðrún Jónsdóttir, talskona Stígamóta.

Nú stendur til að opna stofnanirnar á ný. En auk þess er stefnt að því að auka þjónustuna á höfuðborgarsvæðinu með sólarhringsþjónustu, flytja Stígamót í stærra húsnæði og útbúa athvarf fyrir konur sem eru að brjótast út úr vændi.

„Það er viðurkennd þörf fyrir slíkt athvarf,“ segir Guðrún. „Þar sem útilokað er að fjármagna vinnuna á þessum tímum, munu Skottur deila henni á kvöldin og um helgar í sjálfboðavinnu.“

Skotturnar munu hefja söfnunarátakið á morgun og selja kynjagleraugnanælur fram yfir helgina á 1.000 krónur stykkið og er markmiðið að selja 17.000 nælur. - sv