Jöklafræðingur varar eindregið við ferðum um sprungusvæði jökla

Enginn ætti að vera á ferð um svæðið á Langjökli þar sem banaslysið varð í gær, segir Helgi Björnsson jöklafræðingur. Sjö ára sonur, konunnar sem lést, er ekki í lífshættu og verður útskrifaður af gjörgæslu nú í kvöld.

Mæðginin, sem eru af höfuðborgarsvæðinu, voru í jeppaleiðangri ásamt föður drengsins og fleira fólki. Þau virðast hafa verið á göngu skammt frá jeppunum þegar þau féllu í sprungu í vestanverðum Langjökli. Aðstandendur, ferðalangar og björgunarsveitarmenn lögðust á eitt við björgunina. Urðu björgunarsveitarmennirnir að síga ofan í sprunguna, með höfuðið niður til að geta athafnað sig í þrengslunum. Þegar konan náðist upp um þrjúleytið var hún látin.

Sonur hennar sjö ára hafði fallið dýpra ofan í sprunguna, líklega vel á þriðja tug metra ofan. Það var því ekki fyrr en eftir fjögurra tíma vist í sprungunni sem björgunarsveitarmaður náði að koma til hans böndum, hífa hann í fang sér og fara með drenginn upp á sprungubarminn. Drengnum var haldið sofandi á gjörgæslu þar til í morgun að hann losnaði úr öndunarvélinni. Hann er ekki í lífshættu og líður vel miðað við aðstæður, að sögn vakthafandi læknis. Hann verður útskrifaður af gjörgæslu og fluttur á barnadeild.

Vettvangsstjóri Björgunarfélags Akraness varaði við því í fréttum okkar í hádeginu að slysstaðurinn væri krosssprunginn. Við leituðum til Helga Björnssonar jöklafræðings í dag og spurðum hvort óhætt væri fyrir fólk að fara upp á Langjökul.

„Það er nú erfitt að tala um þetta rétt fyrir stórslys en almennt eru jöklar hættulegir og alls enginn leiksvæði. Jöklar eru seigfljótandi efni og þegar þeir streyma eða flæða fram af fjöllum þá springa þeir á yfirborði. Þarna þar sem þetta slys varð er mjög sprungið. Þarna eiga engir að vera á ferð," segir Helgi.

Þegar vetur er snjóléttir eins og núna - ættu menn að fara mjög varlega um jökla, segir Helgi. Raunar segir hann að svæðið þar sem slysið varð í gær hættulegt hvort sem mikið hefur snjóað eða ekki.

„Ég myndi sneiða hjá því hvenær sem er en aðstæður eru afar erfiðar núna í vetur vegna þess hversu lítið hefur snjóað," segir Helgi.

Helgi ráðleggur fólki sem hyggur samt á ferðalög uppá jökla að leita fyrst upplýsinga hjá til dæmis hjá björgunarsveitum eða Jöklarannsóknarfélagi Íslands.