Umfjöllun: Dramatískur sigur hjá Fram

Framarar sigruðu Stjörnumenn, 3-2, á teppinu í Garðabæ í kvöld eftir að hafa náð forystu snemma leiks og síðan lent undir en Ívar Björnsson tryggði þeim sigurinn með marki á lokamínútum leiksins. Með þessu lyftir Fram sér upp fyrir bæði Keflavík sem tapaði í gær gegn Haukum og Stjörnumenn.

Leikurinn hófst afar rólega en Framarar náðu forskotinu á 18. mínútu og  var þar að verki Ívar Björnsson. Almarr Ormarsson átti sendingu inn fyrir vörn Stjörnunnar sem Ívar skallaði í slá en var fljótur að fylgja eftir og skoraði framhjá liggjandi Bjarna Þórð Halldórssyni í marki Stjörnunnar.

Stjörnumenn voru hinsvegar ekki lengi að jafna, eftir hraða skyndisókn sendi Arnar Már Björgvinsson sendingu út á Atla Jóhannsson sem átti þrumufleyg í samskeytin fjær af um 25 metra færi, algerlega óverjandi fyrir Hannes Þór Halldórsson í marki Fram, svo sannarlega kandídat í mark tímabilsins.

Eftir þetta fjaraði fyrri hálfleikur að mestu út. Stjörnumenn náðu svo forskoti fljótlega í seinni hálfleik, þá fékk Halldór Orri Björnsson góðan tíma á boltanum við vítateiginn og lét vaða sem Hannes Þór hélt ekki í marki fram og var Þorvaldur Árnason fljótastur að átta sig á aðstæðum og setti boltann í netið.

Jón Guðni Fjóluson færði sig fljótlega framar á völlinn og virtist það gefa Fram betra tak á leiknum, hann var nálægt því að skora jöfnunarmark á 73. mínútu þegar aukaspyrna hans af 35 metra færi hafnaði í slánni. Hann skoraði svo jöfnunarmarkið aðeins fjórum mínútum seinna eftir sofandi hátt í vörn Stjörnumanna spilaði hann og Ívar Björnsson sig í gegn og lagði boltann framhjá Bjarna í marki Stjörnunnar.

Eftir þetta reyndu bæði liðin að sækja stigin þrjú og tókst Fram það þegar Ívar Björnsson náði að skora sigurmarkið á 89. Mínútu. Hann fékk langa sendingu fram á völlinn, lék á einn varnarmann Stjörnunnar og setti boltann fallega í nærhornið.

Eftir þetta reyndu Stjörnumenn að jafna en Framarar héldu þetta út og tryggðu því sér annan sigurleikinn í röð eftir erfitt gengi fram að því. Þeir eru því í 5. Sæti 3 stigum á eftir FH og gætu enn tryggt sér Evrópusæti ef úrslit fara þeim hagstæð.

Leikur Fram stórbatnaði eftir að Jón Guðni Fjóluson kom inn á miðjuna og átti hann stóran þátt í endurkomu þeirra. Stjörnumenn hljóta hinsvegar að naga sig í handarbökin fyrir að hafa misst niður forskotið og með því misst Fram yfir sig á stigatöflunni.

Stjarnan 2 – 3 Fram

0-1 Ívar Björnsson(18.)

1-1 Atli Jóhannsson(27.)

2-1 Þorvaldur Árnason(56.)

2-2 Jón Guðni Fjóluson (77.)

2-3 Ívar Björnsson (89.)

Áhorfendur:   789

Dómari: Jóhannes Valgeirsson 6

Skot (á mark): 18 - 9  (7 -4 )

Varin skot: Bjarni Þórður Halldórsson 1  - Hannes Þór Halldórsson 3 

Horn: 5  -3

Aukaspyrnur fengnar : 14  - 11

Rangstöður: 1 - 4

Stjarnan (4-2-3-1)

Bjarni Þórður Halldórsson 5

Bjarki Páll Eysteinsson  6

Tryggvi Sveinn Bjarnason 5

Daníel Laxdal  5

Jóhann Laxdal 6

Atli Jóhannsson 6

Björn Pálsson  5

Arnar Már Björgvinsson  5

Halldór Orri Björnsson 6

Þorvaldur Árnason  6

Ólafur Karl Finsen 4

(68. Garðar Jóhannsson 4)

Fram (4-3 -3)

Hannes Þór Halldórsson 5

Daði Guðmundsson 6

Kristján Hauksson 5

Jón Guðni Fjóluson 7

Samuel Lee Tillen 5

Halldór Hermann Jónsson 6

Hlynur Atli Magnússon 6

Almarr Ormarsson 5

Ívar Björnsson 8 – maður leiksins

Hjálmar Þórarinsson 4

(94. Alexander Veigar Þórarinsson)

Josep Edward Tillen 5

(64. Jón Orri Ólafsson 5)

Leiknum var lýst beint á Boltavakt Vísis og Fréttablaðsins. Til þess að sjá lýsinguna þarf að smella hér: Stjarnan - Fram