Grasið svo hátt að allar kindur Færeyja væru mánuð að éta það

Brian Kerr, þjálfari Færeyinga, var mjög ósáttur með æfingaaðstöðuna sem Ítalir buðu færeyska landsliðinu upp á í Flórens í gær og í fyrradag.

Þjóðirnar mætast þar í undankeppni EM í kvöld en Ítalir létu mótherja sína æfa á völlum sem tilheyra liðum í neðstu deildunum og voru að mati þjálfarans langt frá því að vera boðlegir.

„Grasið var svo hátt á vellinum að allar kindur Færeyja væru mánuð að éta það," sagði Brian Kerr í léttum tón við ítalska fjölmiðla. Kerr talaði einnig um að það væri hola á vellinum sem varð til þess að Christian Mouritsen meiddist á ökkla.

„Vellirnir sem þeir buðu okkur upp á eru ekki vellir sem landslið eiga skilið. Það eru 200 vellir betri en þessi þar sem ég á heima," sagði Brian Kerr en færeyska liðið hefur tapað fyrstu tveimur leikjum sínum í undankeppninni, 1-2 á móti Eistlandi og 0-3 á móti Serbíu. Ítalir unnu fyrsta leik sinn á móti Eistlandi, 2-1.