Spánn leikur í fyrsta skipti til úrslita á HM

Varnarmaðurinn Carles Puyol skallaði Spánverja í úrslitaleikinn á HM í kvöld er Spánn lagði Þýskaland, 1-0. Mark Puyol var laglegur skalli á 73. mínútu. Þetta er í fyrsta skipti sem Spánn kemst í úrslit á HM en Spánverjar mæta Hollendingum í úrslitaleiknum.

Leikurinn fór rólega af stað og það bar helst til tíðinda að maður komst inn á völlinn eftir rúmlega þriggja mínútna leik. Jimmy Jump kemur liggur þar sterklega undir grun.

Á 6. mínútu átti Pedro magnaða stungusendingu á David Villa sem náði skoti á markið. Úthlaupið hjá Neuer var gott og hann bjargaði þar með Þjóðverjum.

Yfirburðir Spánverja á upphafsmínútunum voru með hreinum ólíkindum. Þjóðverjar komust hreinlega ekki í boltann og fylgdust með sóknaraðgerðum Spánverja. Hinir ungu leikmenn Þjóðverja virkuðu yfirspenntir og ekki klárir í slaginn.

Spánverjar fengu algjört dauðafæri eftir 13 mínútna leik. Iniesta með laglega sendingu fyrir markið. Puyol fékk frían skalla á markteig en setti boltann yfir. Lélegt hjá Puyol.

Það var ekki fyrr eftir rúmlega hálftímaleik sem það sást lífsmark með þýsku sóknarmönnunum. Þá átti Trochowski fínt skot að marki utan teigs sem Casillas varði. Þetta var fyrsta skot Þjóðverja í leiknum.

Lokamínútur fyrri hálfleiks voru rólegar en uppbótartíminn hressandi. Þjóðverjar vildu fá víti er Ramos sparkaði í hælinn á Özil. Þjóðverjinn féll en Ungverjinn Viktor Kassai sá ekki ástæðu til þess að nota flautuna.

Talsvert meira líf var í báðum liðum í upphafi síðari hálfleiks. Spánverjar þó sterkari sem fyrr og Alonso var ekki fjarri því að koma þeim yfir á 50. mínútu er skot hans fór rétt fram hjá markinu.

Sókn Spánverja þyngdist með hverri mínútu og eftir 57. mínútna leik komust þeir í tvígang nærri því að skora en heppnin var með Þjóðverjum. Yfirburðir Spánverja algjörir á þessum kafla.

Þjóðverjar hafa sýnt það í keppninni að þó svo þeir liggi til baka eru þeir afar hættulegir í skyndisóknum. Þeir fengu eina slíka er 25 mínútur voru eftir af leiknum. Boltinn endaði hjá varamanninum Kroos sem stóð einn fyrir framan markið en Casillas varði frá honum. Langbesta færi Þjóðverja.

Á 73. mínútu átti Xavi frábæra hornspyrnu. Puyol kom á siglingunni inn í teiginn og stangaði boltann glæsilega í netið. 1-0 fyrir Spánverja og Puyol búinn að bæta fyrir klúðrið í fyrri hálfleik.

Pedro fékk gullið tækifæri til þess að klára leikinn fyrir Spánverja er hann slapp einn í gegnum vörn Þjóðverja. Hann hafði Torres með sér gegn einum þýskum varnarmanni. Pedro ákvað að sleppa því að skjóta sem og gefa boltann. Það varð þess valdandi að hann missti boltann. Ótrúlega klaufalegt.

Það skipti ekki máli því mark Puyol dugði liðinu.

Þýskaland-Spánn 0-1

0-1 Carles Puyol (73.)