Líflátshótanir hræða túlka úr réttarhöldum

Dæmi eru um að sakborningar í alvarlegum brotamálum hafi hótað túlkum í dómsal og hrætt þá svo að þeir hafa hætt í miðjum réttarhöldum. Ákæruvaldið hefur þá þurft að bregða skjótt við og útvega nýja túlka.

Embætti ríkissaksóknara sótti nýverið mál þar sem túlkurinn varð mjög hræddur og kvaðst aldrei ætla að koma aftur. Annar túlkur var fenginn til að hlýða á skýrslutöku, til þess að úr því fengist skorið hvað fram hefði farið. Í ljós kom að sakborningurinn hafði hótað túlknum lífláti. Sækja hefur þurft dómtúlka til annarra landa, því þeir sem eru búsettir hér þora hreinlega ekki að taka starfann að sér.

Þetta kemur fram í viðtali Fréttablaðsins við Valtý Sigurðsson ríkissaksóknara, Kolbrúnu Sævarsdóttur saksóknara og Sigríði Elsu Kjartansdóttur saksóknara. Þau ræða í blaðinu í dag um breytingar sem orðið hafa á rannsóknarferli brotamála og störfum ákæruvaldsins með tilkomu skipulagðrar glæpastarfsemi hér á landi.

„Það eru ekki til löggiltir túlkar í austurevrópskum málum hér á landi," segir Kolbrún. „Oftast fáum við fólk sem gerir þetta utan sinnar hefðbundnu vinnu við eitthvað allt annað. Eða þá að við verðum að fá túlka að utan. Oft er þetta fólk skíthrætt."

Í sumum grófum árásarmálum hafa engir túlkar fengist og eitt tilvik nefna saksóknararnir þar sem flytja þurfti inn túlka frá London. Í því máli var um að ræða árás manna á samlanda sína á Hverfisgötu.

Í mannslátsmálinu í sumarbústaðnum í Grímsnesi þurfti að skipta um túlk og fá nýjan frá útlöndum.

„Í því tilviki var túlkurinn búinn að fá nóg, auk þess sem sakborningarnir kröfðust þess að skipt yrði um túlk," útskýrir Valtýr.

- jss /