Skýrslan fór ekki til bankamálaráðherra

Skýrsla um erfiðleika íslensku bankanna eftir hagfræðiprófessorana Willem Buiter og Anne Sibert var send í forsætisráðuneyti og Seðlabanka í apríl, samkvæmt upplýsingum frá þáverandi forstöðumanni greiningardeildar Landsbanka, Birni Rúnari Guðmundssyni. Hann gat í gærkvöldi ekki sagt með vissu hvort hún hefði farið víðar, en taldi það ólíklegt.

Skýrslan kom aldrei í fjármálaráðuneytið, hvorki í apríl né síðar, að sögn Sigmundar G. Sigurgeirssonar, ráðgjafa fjármálaráðherra. Jón Þór Sturluson, aðstoðarmaður viðskiptaráðherra, segir hana heldur aldrei hafa komið í sitt ráðuneyti.

Rætt hefur verið um skýrsluna síðan í október, þegar Buiter upplýsti um hana og að hann hefði verið beðinn að þegja yfir henni.

Í blaðinu í gær mátti sjá að Ingimundur Friðriksson seðlabankastjóri kynntist efni skýrslunnar ekki fyrr en í júlí á kynningarfundi Landsbankans með Buiter og Silbert. Hann sagði einnig að Seðlabankinn hefði þá ekki haft neitt á móti því að hún yrði birt og Buiter hefur staðfest þau orð við Fréttablaðið.

Þeir Sigmundur og Jón Þór sátu einnig þennan kynningarfund. Yfirskrift hans var „Íslenska bankakrísan og hvernig skal bregðast við henni". Hvorugur þeirra telur að neitt sérstaklega nýtt hafi komið fram á fundinum. Ingimundur hefur sagt það sama.

Helst hafi verið rætt að mesti vandi bankakerfisins væri stærð þess og að auka þyrfti gjaldeyrisvaraforða, segir Sigmundur. „Á engan hátt var það upplifun [mín] að þarna væru á ferð nýjar upplýsingar eða nýjar viðvaranir umfram það sem hafði verið í umræðunni [...] mánuðina á undan," segir hann.

Jón Þór segir sömuleiðis að efni fundarins hafi að mörgu leyti verið kunnuglegt. „Helsta ráðleggingin var að sækja um aðild að Evrópusambandinu og að auka gjaldeyrisvaraforðann. [...] Ég man ekki til þess að þau hafi lagt sérstaklega til að við leituðum til AGS, en það var nefnt sem ein leið af mörgum," segir hann.

Í Seðlabanka og forsætisráðuneyti fengust þessar upplýsingar ekki staðfestar, en verið er að kanna málið.klemens@fréttabladid.is