Mane rekinn frá Espanyol

Espanyol er í miklum vandræðum í spænsku 1. deildinni í knattspyrnu og hefur nú rekið þjálfarann Mane eftir 4-0 tap fyrir Malaga. Mane er annar þjálfarinn á tveimur mánuðum sem rekinn er frá félaginu en hann tók við 1. desember sl.

Espanyol hefur aðeins náð í þrjú stig úr síðustu sex leikjum sínum í deildinni síðan Mane tók við og er í 18. sæti deildarinnar - fimm stigum frá því að ná úr fallsæti.

Spænska blaðið Marca heldur því fram að fyrrum varnarmaður Espanyol, Maricio Pochettino muni taka við liðinu og gerast þriðji þjálfari þess á hálfu tímabili.

Næsti leikur Espanyol er gegn erkifjendunum í Barcelona í fjórðungsúrslitum konungsbikarsins annað kvöld.