Myndi skipta á öllum verðlaunum fyrir sigur í deildinni

Steven Gerrard fer ekkert leynt með hver sé æðsti draumur sinn með Liverpool. Hann segist vera til í að skipta á hvaða verðlaunum sem er fyrir sigur í ensku deildinni.

Það eru orðin tæplega 20 ár síðan Liverpool vann síðast ensku deildina og ljóst að leikmenn líkt og stuðningsmenn eru orðnir langþreyttir á því að landa ekki stóra titlinum heima.

Gerrard segir einnig í viðtali við News of the World að það segi mikið um lið Liverpool að rætt sé um að hann sé besti knattspyrnumaður heims í dag.

Hafa menn á borð við Zinedine Zidane og Johan Cruyff haft á orði að Gerrard sé sá besti þessa dagana.

„Það eru margir hjá okkur sem eiga skilið klapp á bakið fyrir þá staðreynd að maður eins og Cruyff segi að við séum það lið sem önnur lið Evrópu hræðast. Margir hafa sagt fallega hluti um okkur og það segir ýmislegt um frammistöðuna," sagði Gerrard.

„Hvað varðar að ég sé sagður sá besti í heimi þá er alltaf gaman að heyra slíkt, sérstaklega þar sem það eru frábærir leikmenn í boltanum í dag. Ég reyni að lesa ekki of mikið úr því en ef fólk segir slíka hluti þá er það hrós fyrir liðið. Maður lítur aðeins vel út ef maður er með góða menn í kringum sig," sagði Gerrard hógvær.

„Það er alltaf gaman að njóta virðingar en það sem gleður mest er að vinna titla. Ef við vinnum ensku deildina í ár þá mun sá titill fara á stall með Istanbúl sem eitt mesta afrek í sögu félagsins. Ég hef sagt áður að ég myndi skipta á öllum verðlaunum mínum núna og síðar fyrir sigur í deildinni í ár," sagði Gerrard.