Trapattoni dreymir um að leggja landa sína að velli

Landsliðsþjálfarinn Giovanni Trapattoni hjá Írlandi kveðst ekki vera að hugsa um neitt annað en að sigra þegar landar hans Ítalir koma í heimsókn til Dyflinnar í toppbaráttuleik 8. undanriðils HM 2010.

Ítölum nægir jafntefli í leiknum til þess að tryggja sér efsta sæti riðilsins og farseðilinn á lokakeppnina í Suður-Afríku næsta sumar en með sigri Íra ráðast úrslitin í lokaumferð riðilsins. Trapattoni var spurður á blaðamannafundi fyrir leikinn hvort að honum þætti ekki óþæilegt að vera í þessarri stöðu að geta komið í veg fyrir að landar sínir komist á lokakeppni stórmóts.

„Eigið þið vini? Grípið þið nokkurn tímann í spil með þeim? Þegar þið eruð að spila við þá, viljið þið þá vinna eða tapa? Við spilum alltaf til sigurs og megum ekki hugsa um að jafntefli sé nóg til þess að tryggja okkur í umspilssæti. Þessir tveir leikir sem eru eftir í riðlinum eru gríðarlega mikilvægir og við þurfum að vinna þá báða," sagði Trapattoni.