Hughton segist njóta trausts hjá Newcastle

Chris Hughton, settur knattspyrnustjóri Newcastle, segir ekkert til í slúðri ensku blaðanna þar sem sagt er að hann njóti ekki trausts leikmanna liðsins.

Hughton stýrir Newcastle ásamt Colin Calderwood í fjarveru Joe Kinnear, en þó árangur liðsins undir stjórn Kinnear hafi ekki verið glæsilegur - hefur hann heldur versnað síðan Hughton tók við.

Því hefur verið haldið fram að Terry Venables verði fenginn til að taka tímabundið við liðinu til að reyna að forða því frá falli.

"Ég er sannfærður um að ég nýt 100% stuðnings í búningsherberginu og það truflar mig ekki þó eitthvað svona sé haft eftir leikmanni. Staðreyndin er sú að það er ekkert til í því sem skrifað hefur verið, svo ég er ekki að velta mér upp úr því," sagði Hughton í samtali við Sky.