Bullard er miður sín

Miðjumaðurinn Jimmy Bullard hjá Hull segir að óglæsileg byrjun á ferli hans með Hull City hafi valdið sér kinnroða. Hinn þrítugi baráttujaxl meiddist á hné eftir aðeins 37 mínútur í fyrsta leik sínum fyrir félagið.

Bullard var áður á mála hjá Wigan og Hull og var farinn að banka hressilega á dyrnar hjá enska landsliðinu. Hann var keyptur á fimm milljónir punda til Hull í janúar, en það var metfé fyrir þetta litla félag.

Eftir aðeins rúmlega hálftíma leik í frumraun hans með Hull gegn West Ham, skaddaði hann krossbönd í hnénu og verður frá keppni í minnst hálft ár.

"Það er alveg sama hvernig maður lítur á þetta. Þetta var ömurlegt. Ég skammaðist mín ef ég á að segja alveg eins og er. Mér er alveg sama hvað hver segir, ég var búinn að jafna mig í hnénu eftir fyrri meiðsli," sagði Bullard, sem missti úr 16 mánuði vegna hnémeiðsla þegar hann var hjá Fulham.

"Það var of langt að vera svona lengi frá keppni og ég gæti það ekki aftur. Það er auðveldara að horfa fram á sex mánuði frá keppni og ég er þegar búinn með mánuð af þeim tíma," sagði Bullard, sem þegar er kominn af hækjunum.