Quaresma til Chelsea

Ricardo Quaresma hefur verið lánaður frá Inter til Chelsea út leiktíðina. Þessi portúgalski vængmaður gekk til liðs við Inter frá Porto í sumar en hefur ekki fundið sig í ítalska boltanum.

Sögur voru í gangi um að Quaresma væri á leið til Tottenham eftir að hann sást í Lundúnum í dag. Nú er hinsvegar ljóst að hann fundaði með forráðamönnum Chelsea.

Quaresma var á sínum tíma í herbúðum Barcelona í skamman tíma en eftir að hafa farið á kostum með Porto í Meistaradeildinni var hann eftirsóttur af mörgum stórliðum.