Alltaf gleði hjá FM 957

Stuðboltarnir á útvarpsstöðinni FM 957 héldu upp á tuttugu ára afmæli sitt á Nasa á laugardaginn. Stöðin stóð svo sannarlega undir nafni því allir voru í stuði.

„Við vöknuðum með hausverk á sunnudeginum en gleði í hjarta, það var bara svoleiðis," segir Brynjar Már, dagskrárstjóri útvarpsstöðvarinnar FM 957. Hún náði þeim merka áfanga á laugardaginn að hafa verið í loftinu í tuttugu ár. Sem þykir nokkuð vel af sér vikið í hinum síbreytilega og óútreiknanlega fjölmiðlaheimi Íslands.

Tónlistarmenn og gamlir starfsmenn stöðvarinnar létu ljós sitt skína í þessari tveggja daga afmælisveislu og útvarpsmenn rifjuðu upp mörg eftirminnileg atvik í sögu stöðvarinnar á föstudeginum. Laugardagurinn fór hins vegar í partýið á Nasa þar sem vildarvinir stöðvarinnar héldu uppi stuðinu áður en veislan hófst. „Þetta gekk framar öllum vonum og var bara alveg æðislega skemmtilegt kvöld, allir brosandi og glaðir," segir Brynjar. Útvarpsstöðin verður í Vestmannaeyjum um næstu helgi og hyggst mála eyjuna rauða.