Gengið yfir hálendið á þrjátíu dögum

„Svona ferðalag tekur gríðarlega mikið á og ég er ekki frá því að ég hafi lést um fimm eða sex kíló á þessum þrjátíu dögum. En það er algjörlega þess virði. Reynslan er ótrúleg og það eru forréttindi að fá borgað fyrir að starfa við þetta," segir Róbert Þór Haraldsson hjá Íslenskum fjallaleiðsögumönnum. Róbert kom til byggða á mánudag ásamt sjö erlendum ferðamönnum eftir þrjátíu daga langt ferðalag um hálendi Íslands.

Hópurinn lagði af stað frá Ásbyrgi í Öxarfirði hinn 29. júní síðastliðinn. Er hér um að ræða lengstu skipulögðu gönguna sem boðið er upp á hér á landi í sumar. Leið hópsins lá meðal annars upp í gegnum Jökulsárgljúfur, að Dettifossi, yfir að Kröflu, niður í Mývatnssveit, yfir Gæsavatnaleið, niður Vonarskarð og endaði í Vík eftir ferð yfir Mýrdals­jökul.

Var gengið að meðaltali sjö til tíu klukkustundir á dag. Á leiðinni hvíldi hópurinn sig í fjóra daga. „Þetta er alls ekki stysta leiðin en alveg örugglega sú athyglisverðasta, enda ótal margt að sjá," segir Róbert.

Ferðamennirnir í hópnum eru frá Kanada, Bandaríkjunum, Noregi, Danmörku, Noregi, Belgíu og Frakklandi. „Á svona göngu er ekki um neitt annað að ræða en að spjalla saman og því myndast sterk vináttubönd. Það er alltaf happa og glappa hvernig svona hópar ná saman en í þetta sinn tókst það hreint ótrúlega vel. Hvort sem menn eru reyndir göngugarpar eða ekki, þá vaxa þeir á leiðinni og verða sterkari á eftir."

Róbert segir þó afskaplega gott að koma heim eftir slíka ferð. „Skiljanlega er fólkið þreytt. Á einum tímapunkti var búið að plástra sjö af tíu tám á konu sem gekk með okkur, en hún kvartaði aldrei og hélt ótrauð áfram," segir Róbert Þór Haraldsson.