Arsenal er í betri stöðu

Gareth Barry, leikmaður Aston Villa, viðurkennir að Arsenal sé komið í betri stöðu en Villa til að ná hinu dýrmæta fjórða sæti í ensku úrvalsdeildinni í vor - sætinu sem gefur þátttökurétt í Meistaradeildinni.

Arsenal hefur tekið góðan sprett í deildinni undanfarið á meðan Aston Villa hefur verið með allt niður um sig. Villa hefur aðeins fengið eitt stig úr síðustu fjórum deildarleikjum og er búið að missa Arsenal fram úr sér á markamun. Bæði lið hafa 52 stig í 4.-5. sætinu.

Aston Villa þarf nauðsynlega að rétta úr kútnum ef liðið ætlar ekki að missa Arsenal lengra fram úr sér, en eftir að Villa tapaði heima fyrir Tottenham í síðasta leik, verða verkefnin ekki auðveldari í deildinni. Næsti leikur liðsins er nefnilega útileikur gegn sjóðheitu liði Liverpool.

"Það eru níu leikir eftir og Arsenal er klárlega komið í betri stöðu. Arsenal sér að sjálfstraustið er ekki mikið í okkar herbúðum um þessar mundir. Við þurfum hinsvegar ekki nema einn góðan leik til að snúa þessu við, svo við verðum að vera jákvæðir og reyna að snúa við blaðinu," sagði Barry.