Laun staðgengla forseta lækkuð

Samkvæmt frumvarpi efnahags- og skattanefndar verða laun handhafa forsetavalds hér eftir fimmtungur af launum forseta, en ekki full laun hans. Handhafar þessir gegna störfum forseta þegar hann er forfallaður.

Jóhanna Sigurðardóttir forsætis­ráðherra lýsti því yfir í júní að hún vildi afnema þessar greiðslur með öllu.

Magnús Orri Schram, þingmaður Samfylkingar, segir að ráðgjafar efnahagsnefndar hafi ekki talið ráðlegt að ganga svo langt, því í stjórnarskrá er talað um „greiðslur" til handhafanna. Frekari lækkun gæti skilist þannig að verið væri að afnema greiðslurnar.

Ragnheiður Ríkarðsdóttir, þingmaður Sjálf­stæðis­flokks, telur reyndar lögin brjóta stjórnarskrá, því ekki megi lækka laun forseta.

Magnús segir þetta ekki rétt. 9. grein stjórnar­skrár segi óheimilt að lækka laun forsetans, en nefni ekki að bannað sé að lækka laun handhafanna.

Skilja mátti á stjórnarandstöðu í gær að henni þætti þetta frumvarp, sem á að spara um átta milljónir á ári, bera merki vinsældaöflunar, frekar en raunverulegra aðgerða. Laun handhafa forsetavalds væru bara dropi í hafið. - kóþ