Hrædd um börnin á leiðinni í bótaviðtöl

Soffía segir fulltrúa Vinnu­málastofnunar hafa skikkað börn hennar, 18 og 26 ára karlmenn og tvítuga konu, til að mæta vikulega í viðtal til hans til Ísafjarðar eigi þau að halda bótum sínum.

Þar að auki hafi þeim verið gert að sækja námskeiðið „Sterkari starfsmaður: Upplýsingatækni og samskipti“ sem ætlað er fólki í atvinnuleit á norðanverðum Vestfjörðum og hefst á föstudag. Námskeiðið er kennt í áttatíu klukkustundir nú fyrir jól og sjötíu eftir jól.

Auk þess, að mati Soffíu, sem Gemlufallsheiðin er mjög vafasöm að vetri til segir hún ferðirnar geta tekið heilu og hálfu dagana. Aðeins einn sonur hennar sé á bíl og þegar hann eigi ekki að mæta þurfi hin að taka rútu. Þau þurfi svo að bíða tímunum saman að loknum fundi eftir rútu til baka.

„Það hlýtur einhver í Reykjavík að geta stoppað þessa vitleysu,“ segir Soffía, sem telur fulltrúann á Ísafirði ganga afar hart fram gegn börnum hennar og sýna lítinn skilning.

Soffía hefur ákveðið að börn hennar muni ekki framar leggja í þennan leiðangur í vetur. „Ég ætla ekki að horfa aftur á eftir þeim út í þessa dauðagildru yfir heiðina,“ segir hún og spyr hvað Vinnumálastofnun mun taka til bragðs ef bani hlýst af ferðalögum sem þessum.

Unnur Sverrisdóttir, sviðsstjóri stjórnsýslusviðs hjá Vinnumálastofnun, segist ekki geta tjáð sig um þetta tiltekna mál. Hins vegar hafi ungt fólk verið sett í forgang þegar kemur að því að reyna að halda fólki í virkni, enda sýni rannsóknir að sá hópur sé líklegastur til að verða samdauna atvinnuleysinu, ef svo megi segja.

Vinnumálastofnun beri skylda til að sinna hópnum vel og halda honum virkum og því sé mikil skylduvirkni teiknuð inn í lög um atvinnuleysistryggingasjóð. 

„Þegar þú sækir um atvinnuleysisbætur þá ertu að sækja um vinnu í leiðinni og þú ert líka að sækja um þátttöku í vinnumarkaðsaðgerðum svokölluðum, og í þeim geta falist viðtöl og námskeið og annað slíkt,“ segir Unnur.

stigur@frettabladid.is