Spár um atvinnuleysi ganga eftir

„Það jákvæða sem er að frétta af vinnumarkaði er að atvinnuleysi á meðal námsmanna varð minna en við óttuðumst," segir Gissur Pétursson, forstjóri Vinnumálastofnunar. Atvinnuleysi í júlí var átta prósent sem jafngildir því að 13.756 manns hafi að jafnaði verið án atvinnu.

Gissur segir að atvinnuleysistölur muni lækka á næstunni sökum þess að námsmenn hverfi af vinnumarkaði. Hins vegar megi búast við að atvinnuleysistölur hækki aftur á síðustu mánuðum ársins og spár um tíu prósenta atvinnuleysi að meðaltali á ársgrundvelli gangi eftir. „Við vonum hins vegar að þetta óvissuástand í efnahagsmálum fari að gefa eftir því að ef tiltrú atvinnurekenda eykst eru hlutirnir fljótir að gerast."

Þeir sem verið hafa á atvinnuleysisskrá lengur en í sex mánuði eru nú um helmingur atvinnulausra eða ríflega sjö þúsund manns. Frá því í febrúar hefur langtímaatvinnulausum fjölgað úr um tíu prósentum allra atvinnulausra í um helming þeirra.

„Þetta er áhyggjuefni því að þetta snýr að því að menn haldi vinnuhæfni og starfshvata," segir Gissur. Hann telur að allt of fáir séu skráðir í þau úrræði sem standa til boða, en þeir voru 612 í júlí sem nemur aðeins fjórum prósentum af heildinni. „Reynslan sýnir að það þarf bæði að ýta og draga fólk sem lendir í langtíma atvinnuleysi. Það liggur við að það þurfi að beita fólk þvingunum til að úrræðin séu nýtt. Við erum þó óhrædd við að gera það, því að við vitum að fólki er greiði gerður með því að koma því af stað út á vinnumarkaðinn að nýju."