Zola vill binda endi á Tevez-málið

Gianfranco Zola hefur fengið sig fullsaddann af Tevez-málinu svokallaða en svo virðist sem enskir fjölmiðlar finni sífellt nýja fleti á málinu.

Fyrr í vikunni gekk West Ham frá samkomulagi um bótagreiðslu við Sheffield United upp á 10-15 milljónir punda. Hins vegar hefur verið greint frá mögulegum málaferlum í tengslum við Neil Warnock, fyrrum knattspyrnustjóra United, sem og við leikmenn félagsins.

Þá var einnig fjallað um það í dag að Wigan ætlaði mögulega í mál við West Ham þar sem liðið lenti fyrir neðan West Ham í lok tímabilsins 2006-7, þegar Carlos Tevez lék með liðinu, og fékk þar með minna verðlaunafé en ella.

Forráðamenn Wigan sögðust hins vegar ekki ætla í mál við West Ham vegna þessa.

Zola segist búinn að fá nóg af öllum þessum fréttaflutningi.

„Ég vona að þessu máli sé lokið. Ég vona að við fáum að vera í friði í framtíðinni og gert okkar framtíðaráætlanir," sagði Zola. „Þetta mál hefur verið rætt síðan ég kom til félagsins og nú þegar búið er að ná sáttum er enn verið að ræða það."

„Þetta félag hefur þurft að ganga í gegnum svo margar raunir á þessum ári. Við munum takast á við þær allar."