Heimildarmynd um RAX

„Mér líst bara ágætlega á að vera í mynd, ætli ég verði samt ekki að fara í extreme makeover áður en tökur hefjast,“ segir Ragnar Axelsson, ljósmyndari. Í undirbúningi eru heimildarmynd um ljósmyndarann og ferðir hans til Grænlands en á þessu ári er væntanleg bók frá Grænlandsferðum hans undanfarin 25 ár. Ragnar segist ekki hafa haft hugmynd um þegar hann byrjaði á því að fara til Grænlands hvað verkefnið myndi skila honum. En þegar umræðan um hlýnun jarðar fór sífellt að verða háværari varð Ragnari ljóst að hann hafði nokkuð magnaðan vitnisburð um þessa mál á mynd; allar þær breytingar sem hafa orðið á Grænlandi á aðeins aldarfjórðungi.

Að sögn Ragnars mun bókin sýna hvernig landslagið á Grænlandi hefur gjörbreyst á tiltölulega skömmum tíma, íshellan hefur þynnst og heilu veiðimannasamfélögin eru smám saman að þurrkast út. „Þegar ég fór fyrst og hitti veiðimenn í einu þorpi voru þeir sextíu. Í dag eru átján eftir,“ útskýrir Ragnar sem leggur lokahöndina á bókina með því að taka nokkrar loftmyndir af Grænlandi í lok apríl eða byrjun maí. Þá er jafnframt reiknað með því að tökur á heimildarmyndinni byrji. „Það mun margt breytast á næstu árum því þessi þróun er svo hröð. Dýralífið á til að mynda eftir að taka stakkaskiptum, þau eiga eftir að leita meira inní byggðirnar,“ útskýrir Ragnar.

Margrét Jónasdóttir er einn framleiðandi heimildarmyndarinnar um RAX og ferðir hans til Grænlands. Hún segir mikinn áhuga fyrir þessu verkefni enda sé mikil og heit umræða um þessi málefni. Þannig ætlar norska ríkissjónvarpið að koma að framleiðslu myndarinnar og þá hefur aðstandendum hennar verið boðið til Kanada á mikla heimildarmyndahátíð; Hot Docks. „Þar sitja allar helstu sjónvarpsstöðvar Bandaríkjanna og Kanada auk rjómans frá þeim evrópsku og vonandi gengur okkur bara vel að selja þeim þessa hugmynd,“ segir Margrét. freyrgigja@frettabladid.is