Maradona: Ég mun ekki hætta sem landsliðsþjálfari

Knattspyrnugoðsögnin Diego Maradona hefur ítrekað að hann sé ekki að fara að hætta sem landsliðsþjálfari Argentínu en argentískir fjölmiðlar hafa gefið annað í skyn undanfarna daga.

Samkvæmt fjölmiðlum í Argentínu á Maradona í harðvítugum deildum við Carlos Bilardo, yfirmanna landsliðsnefndar hjá argentínska landsliðinu, en Maradona segir ekkert hæft í því.

„Bara svo það sé á hreinu þá er ég alls ekki að fara að hætta sem landsliðsþjálfari. Ég hef heldur ekki átt í rifrildi við Bilardo og ég er satt best að segja orðinn þreyttur á að menn séu að skrifa fréttir um eitthvað sem á sér ekki stað í raunveruleikanum.

Ef ég ákveð einhvern tímann að hætta þá mun það ekki fara á milli mála og ég segi það bara hreint út. Framundan eru tveir mikilvægustu leikirnir á ferli mínum sem þjálfari og ég er sannfærður um að þetta fari vel," segir Maradona á blaðamannafundi fyrir leik Argentínu og Perú í undankeppni HM 2010. Leik sem Argentína verður að vinna.