Þráinn sagði sig úr þingflokknum - Margrét baðst afsökunar

Þráinn Bertelsson sagði sig formlega úr þingflokki Borgarahreyfingarinnar í dag. Ásta Ragnheiður Jóhannesdóttir, forseti Alþingis, las upp bréf frá Þráni, þess efnis, við upphaf þingfundar í dag. Í bréfinu segist Þráinn hafa slitið samskiptum við fólk sem telji orðheldni vera merki um alvarlega heilabilun.

Eftir að forseti las upp bréfið steig Margrét Tryggvadóttir, þingmaður Borgarahreyfingarinnar í ræðustól og baðst afsökunar á bréfi sem hún skrifaði og hafði verið í umræðunni síðastliðna daga. Það hafi ekki verið ætlunin að veitast að persónu hans.

Í bréfinu sem Margrét Tryggvadóttir skrifaði til Katrínar Snæhólm Baldursdóttur en barst til allrar stjórnar Borgarahreyfingarinnar velti Margrét því fyrir sér hvort Þráinn væri með alzheimer á byrjunarstigi.