Sven-Göran hafnaði Portsmouth

Tord Grip, aðstoðarmaður Sven-Göran Eriksson, segir að þeir hafi hafnað boði um að taka við knattspyrnustjórn Portsmouth.

Þetta sagði hann eftir að Eriksson var rekinn úr starfi sem landsliðsþjálfari Mexíkó en Grip var einnig aðstoðarmaður hans þar.

Eftir að Tony Adams var rekinn úr starfi munu forráðamenn Portsmouth hafa komið að máli við Eriksson. Þeir vildu þá hins vegar einbeita sér að sínum störfum með landsliði Mexíkó.

„Portsmouth ræddi við Sven en hann sagði þeim að hann vildi ljúka verkefni sínu í Mexíkó. Sven naut sín þar - veðrið er gott og fólkið mjög vingjarnlegt."

„Knattspyrnusamband Mexíkó var einnig staðfast í sinni trú um að hann væri rétti maðurinn til að fara með liðið á HM í Suður-Afríku."

Grip sagði einnig að þeir væru nú að leita sér að nýju framtíðarverkefni.

„Síðustu tvö ár hafa verið erfið. Við viljum fara til félags þar sem við getum verið í nokkur ár og unnið að langtímaverkefni."