Nafn Jóhönnu var ekki að koma fram fyrst í dag

Geir Haarde var ekki að heyra hugmyndina um að gera Jóhönnu Sigurðardóttur að forsætisráðherra í fyrsta sinn í dag. Össur Skarphéðinsson iðnaðarráðherra segir að Geir hafi áður heyrt nafn hennar nefnt í þessu sambandi. Geir og Þorgerður Katrín Gunnarsdóttir varaformaður sögðust bæði hafa heyrt möguleikann nefndan í dag, rétt áður en ríkisstjórnin féll.

Geir sagðist í Kastljósinu fyrst hafa heyrt af því að Samfylkingin hefði krafist forsætisráðherra embættisins í gær og að nafn Jóhönnu hefði dúkkað upp í dag. Össur segir þetta ekki allskostar rétt. „Formaður Sjálfstæðisflokksins var ekki að heyra nafn Jóhönnu nefnt í þessu sambandi í fyrsta skipti í dag en hinsvegar held ég að því hafi aldrei verið fleytt við varaformann Sjálfstæðisflokksins," segir Össur í samtali við Vísi.

Aðspurður hvernig Össuri lítist á framhaldið segir hann: „Iðnaðarráðherra er með allra bjartsýnustu mönnum og ég er alltaf vongóður. Ég er sannfærður um að út úr þessu komi kraftmikil aðgerðarstjórn," segir Össur en bætir því við að hann viti ekki á þessu stigi hvernig hún muni líta út. „Það eru margir möguleikar í stöðunni, mikið af góðum hugmyndum en það hefur vantað kraftinn til þess að hrinda þeim í framkvæmd. Þann kraft erum við að reyna að kalla fram með því að bjóða fram okkar styrk til þess að verkstýra þeirri framkvæmd," segir ráðherrann.

„Við þekkjum vandamálin, við vitum hver þau eru og við höfum ákveðnar lausnir. En það verður bara að segjast að það hefur reynst fjandanum erfiðara að hrinda þeim í framkvæmd með Sjálfstæðisflokknum," segir Össur Skarphéðinsson, iðnaðarráðherra, að lokum.