Illa gengur að manna störfin

Einhver bið verður á því að allir foreldrar barna sem sóttu um pláss á frístunda­heimilum Reykjavíkurborgar fái pláss fyrir börn sín. Yfirmaður frístundaheimilanna segir koma á óvart hversu erfitt sé að manna stöður.

„Þetta er að saxast inn, en okkur vantar enn um 100 starfsmenn,“ segir Soffía Pálsdóttir, skrifstofustjóri tómstundamála hjá Íþrótta- og tómstundaráði borgarinnar.

Borginni bárust um 2.700 umsóknir um pláss á frístundaheimilum í haust. Soffía segir óljóst hversu margir þurfi að bíða eftir að komast að, en fyrsti skóladagur er á mánudag. Hún er ekki bjartsýn á að það takist að manna allar stöður fyrir mánudag, en það eigi ekki að taka langan tíma.

Fjöldi umsókna um pláss á frístundaheimilum er svipaður og í fyrra, sem kemur á óvart, segir Soffía. Það sýni að foreldrar forgangsraði með hag barna sinna í fyrirrúmi þrátt fyrir erfitt efnahagsástand. Flestir sem sæki um pláss óski eftir vistun alla daga vikunnar, en búast hefði mátt við því að fleiri sæktu um færri daga í viku í sparnaðarskyni.- bj