Liverpool valtaði yfir Villa - Gerrard með þrennu

Liverpool vann í kvöld öruggan 5-0 stórsigur á Aston Villa í ensku úrvalsdeildinni og hefur fyrir vikið minnkað forskot Manchester United á toppi deildarinnar niður í eitt stig.

Aston Villa sá aldrei til sólar í dag og skoraði fyrirliðinn Steven Gerrard þrennu í leiknum. Dirk Kuyt skoraði fyrsta mark Liverpool, Albert Riera bætti við öðru marki eftir hálftímaleik og Gerrard skoraði tvö af þremur mörkum sínum úr vítum í sitt hvorum hálfleiknum. Síðara vítið var dæmt á Brad Friedel markvörð Villa sem rekinn var af velli í kjölfarið eftir rúmlega klukkutíma.

Aston Villa var fyrir skömmu í góðri stöðu til að tryggja sér sæti í Meistaradeildinni en hefur nú ekki unnið leik síðan í byrjun febrúar og virkar gjörsamlega heillum horfið. Villa á næst leik gegn Manchester United.

Annað er svo sannarlega uppi á teningnum hjá Liverpool, sem vinnur hvern stórsigurinn á fætur öðrum og hefur nú opnað baráttuna um enska meistaratitilinn upp á gátt á ný.

Manchester United hefur 65 stig á toppnum og á leik til góða. Liverpool er í öðru með 64 stig og Chelsea er í þriðja með 61 stig eftir tap fyrir Tottenham í gær.

Arsenal er í fjórða sætinu með 55 stig og Villa í því fimmta með 52 stig.