Erum að komast á beinu brautina, segir Jóhanna

Þegar ríkisstjórnin var mynduð þann 10. maí í vor kynntu þau Jóhanna og Steingrímur sérstaka hundrað daga áætlun um fyrstu aðgerðir. Nú segjast þau búin að afgreiða að mestu 42 af 48 málum sem þar voru sett á blað. Samþykkt Icesave-samningsins frá Alþingi á næstu dögum leiði svo til þess að áætlun Alþjóðagjaldeyrissjóðsins verði afgreidd í kringum næstu mánaðmót, síðan fylgi lánin frá hinum Norðurlöndunum og þá fari menn að sjá til sólar.

Samningar við eigendur krónubréfa um að fjárfesta innanlands eru meðal þess sem ekki hefur náðst fram, þar sem ekki reyndist áhugi hjá hinum erlendu eigendum þeirra. Í staðinn er ætlunin að borga krónubréfaeigendur út í hægum skrefum samkvæmt forgangsröð eftir því sem gjaldeyristekjur leyfa.

Þau Jóhanna og Steingrímur minntust hins vegar hvergi á það að vonir um styrkingu krónunnar og lækkun vaxta hafa brugðist.