Bensínsforstjóri til varnar ráðuneytisstjóra

„Þegar einstaklingur kemst að því að fyrirtæki sem hann á mikið undir í er annað hvort búið að gefa út rangar eða villandi upplýsingar um stöðu sína eða þá að að því steðji slík ógn að líkur séu á gjaldþroti, hver er þá réttur hans?" skrifar Hermann Guðmundsson, forstjóri N1, á vefsvæði Pressunnar þar sem hann bloggar til varnar Baldri Guðlaugssyni fyrrum ráðuneytisstjóra fjármálaráðuneytisins.

Í fréttum í gær kom fram að sérstakur saksóknari væri með mál Baldurs til rannsóknar. Það er þegar hann seldi bréf sem hann átti í Landsbankanum, eftir að hafa setið fund með Alistair Darling auk fjármála- og viðskiptaráðherranna Árna M. Mathísesen og Björgvins G. Sigurðssonar mánuði fyrir hrun.

Bankinn hrundi mánuði síðar og kviknuðu þá grunsemdir um að Baldur, í krafti starfs síns sem ráðuneytisstjóri fjármálaráðuneytisins, hefði búið að innherjaupplýsingum.

Hermann veltir þessari óheppilegu stöðu fyrir sér á blogginu og skrifar ennfremur:

„Í mínum huga þá er það grundvallarréttur og skylda hvers manns að verja sig og sína fjölskyldu fyrir áföllum og forða tjóni þar sem það er hægt. Hvað er til ráða þegar svona aðstæður koma upp?"

Hermann bendir á að tilvik Baldurs sé gott dæmi um það hversu ófullkomið regluverkið er á mörgum sviðum viðskiptalífsins. Hann tekur svo sérstaklega fram að hann þekki ekkert til Baldurs né hafi hitt hann svo hann sjálfur viti til.

Pistilinn má lesa hér.