Ágúst áfram rektor Landbúnaðarháskólans

Tvær umsóknir bárust um embætti rektors Landbúnaðarháskóla Íslands. Menntamálaráðherra hefur að fenginni umsögn háskólaráðs skipað Ágúst Sigurðsson, núverandi rektor, til áframhaldandi starfa fyrir Landbúnaðarháskólann.

Skipað er í embættið til fimm ára frá 1. ágúst næstkomandi.

Eins og Vísir greindi frá í lok júní, kom Landbúnaðarháskóli Íslands einna verst út úr úttekt Ríkisendurskoðunar á fjárhagsstöðu 50 valinna stofnana í eigu ríkisins. Gert var ráð fyrir að halli á fjárlögum háskólans í lok þessa árs myndi nemi um 265 milljónum króna eða 47% af fjárheimild skólans.

Fyrir tæpum mánuði síðan, var Ágúst inntur eftir því hvort hann myndi sækjast eftir áframhaldandi stöðu rektors Landbúnaðarháskólans. Þá sagði Ágúst: „Ég hef ekki tekið ákvörðun um það en skólinn þarf klárlega frekara fjármagn og með áframhaldandi fjársvelti á ég ekki von á að starfa hér áfram."

Að neðan má sjá frétt Vísis um Landbúnaðarháskólann frá því í lok júni, þar má meðal annars sjá ofangreind ummæli Ágústs.