Rektor Landbúnaðarháskólans: Skólinn var sveltur

Landbúnaðarháskóli Íslands kom einna verst út úr úttekt Ríkisendurskoðunar á fjárhagsstöðu 50 valinna stofnana í eigu ríkisins. Gert er ráð fyrir að halli á fjárlögum háskólans í lok þessa árs nemi um 265 milljónum króna eða 47% af fjárheimild skólans. Ágúst Sigurðsson, rektor Landbúnaðarháskólans, sagði í samtali við Vísi að skólinn hafi verið sveltur um áraraðir.

Ágúst segir að það sé nokkuð ljóst að hallinn sé mjög mikill en það hafi verið vitað mál að skólinn stæði illa fjárhagslega séð. Rekstraráætlun skólans var samþykkt og var gert ráð fyrir slíkum halla í þeirri áætlun.

„Skólinn hefur verið undirfjármagnaður um 10% í mörg ár. Háskólinn á Akureyri var í svipaðri stöðu og við, þeir fengu aukafjárveitingu upp á 233,5 milljónir en við höfum ekki fengið neinar aukafjárveitingar," segir Ágúst.

Ennfremur segir Ágúst: „Það er mikilvægt í þessu ljósi að þessi halli okkar er skuldir við ríkissjóð en ekki einhverjar skuldir við lánastofnanir vegna óreiðu á fjármálum skólans. Málið er einfaldlega það að við höfum haft mjög takmarkaða fjármuni til að spila úr og þar með reka háskólann á eðlilegum forsendum."

„Við vorum skilin eftir þegar fjárlög voru ákveðin sl. haust. Stjórnvöld vissu af þessum halla og við höfum beitt öllum ráðum til að spara. Ástæðu hallans má auk þess rekja til þess að hér var stofnaður Landbúnaðarháskóli þann 1. janúar 2005 með því að sameina þrjár stofnanir. Til að stofna háskóla þá þarf frekara fjármagn en var til staðar á þeim tíma,“ segir rektorinn.

„Hallanum linnir ekki fyrr en við fáum auka fjárveitingar, ef það gerist ekki eru stórkostlega breytingar væntanlegar á rekstri skólans, það er ekki möguleiki til frekari sparnaðar við óbreyttar aðstæður," sagði Ágúst.

Ágúst telur ennfremur að sameining háskóla leysi ekki allan vandann, hins vegar eru tækifæri með verulegri samþættingu við Háskóla Íslands. „Það hefur verið starfandi nefnd varðandi fýsileika á sameiningu við Háskóla Íslands en við munum fyrst kynna niðurstöður þeirra viðræðna fyrir menntamálaráðherra áður en þær upplýsingar verða gerðar opinberar," sagði Ágúst.

Aðspurður um það hvort hann myndi sækjast eftir áframhaldandi stöðu rektors Landbúnaðarháskólans, sagði Ágúst: „Ég hef ekki tekið ákvörðun um það en við þurfum klárlega frekara fjármagn og með áframhaldandi fjársvelti á ég ekki von á að starfa hér áfram.“