Hvað var Carlos Tevez með á hausnum ? - myndir

Carlos Tevez var í gær kynntur sem nýr leikmaður Manchester City en hann hefur spilað með nágrönnunum í Manchester United undanfarin tvö tímabil. Tevez var nýkominn úr sumarfríi þegar hann mætti á City of Manchester Stadium til að hitta fjölda blaðamanna og ljósmyndara.

Mesta athygli vakti heklað hárband sem Tevez var með á hausnum en það gat næstum því talist vera húfa. Enginn þorði þó að spyrja Argentínumanninn út í hárbandið en á einum netmiðlinum var grínast með að hann hefði fengið hárbandið í kveðjugjöf frá ömmu sinni.

Tevez var kokhraustur á blaðamannafundinum og talaði um að hann ætlaði að vinna titla með Manchester City og koma liðinu aftur í hóp stærstu félaga Englands. Tevez náði að vinna alla titla í boði á tveimur árum með United þar af enska meistaratitilinn bæði árin.

Hér fyrir neðan má sjá myndaalbúm þegar Carlos Tevez mætti á blaðamannafundinn í gær.