Getum unnið alla ef við spilum eins og móti Real

Rafael Benitez fullvissaði alla á blaðamannafundinum fyrir leik Manchester United og Liverpool á Old Trafford í dag að Liverpool geti vel unnið upp sjö stiga forskot United sem á auk þess einn leik inni. Liðin mætast eftir rúman klukkutíma í beinni á Stöð 2 Sport 2.

„Þeir eru ekki ósnertanlegir og auðvitað trúi ég því að við getum unnið," sagði Rafael Benitez, stjóri Liverpool en hann viðurkennir að Liverpool verði að vinna í dag til að halda meistaravoninni lifandi.

„Ef við vinnum ekki þennan leik þá verður mjög erfitt að vinna titilinn. Ef við ætlum að vera með í titilbaráttunni þá verðum við að vinna þennan leik," sagði Benitez.

Liverpool-liðið átti snildarleik í vikunni þegar spænsku meistararnir í Real Madrid yfirgáfu Anfield með skottið á milli lappanna eftir 4-0 tap.

„Ef við spilum eins og við gerðum á móti Real Madrid þá getum við unnið alla. Það er allt hægt. Við þurfum bara að spila á sama tempói og halda boltanum eins vel og við gerðum í þeim leik," sagði Benitez.

„Það er mín tilfinning að allir séu klárir og hlakki til þess að spila þennan leik alveg eins og á móti Real í vikunni," sagði Benitez.