Danir nudda salti í sár Svía

Danir eru nú í sigurvímu eftir að landsliðinu í knattspyrnu tókst að tryggja sér farseðilinn til Suður-Afríku þar sem heimsmeistarakeppnin fer fram næsta sumar.

Þeir tryggðu sér efsta sæti síns riðils í undankeppninni með því að vinna 1-0 sigur á Svíum um helgina. Fyrir vikið eiga nú Svíar afar litla möguleika á að komast á HM.

Þetta leiðist Dönum ekki og hefur nú íþróttavefurinn sporten.dk komið fram með tíu tillögur fyrir Svía um hvernig þeir geta varið næsta sumri - fyrst þeir verða ekki með á HM.

Meðal þess sem stungið er upp á er að framlengja bandítímabilið sem og að keppa í hver getur troðið mestu munntóbaki í vörina. Nú eða þá dusta rykið af gömlu VHS-upptökunum af leikjum Svía frá HM í Bandaríkjunum árið 1994 þar sem Thomas Brolin sló eftirminnilega í gegn.