Gerrard hreinsaður af ásökunum

Steven Gerrard, fyrirliði Liverpool, hefur verið sýknaður af ákærum fyrir að hafa kýlt mann á öldurhúsi í desember síðastliðnum. Dómstóll dæmdi að Gerrard hafi verið að beita sjálfsvörn.

Sex vinir Gerrard voru dæmdir sekir en Gerrard sá eini sem var hreinsaður af ásökunum.

Atvikið átti sér stað á Lounge Inn skemmtistaðnum í Southport aðfaranótt 29. desember þar sem Gerrard var að fagna ásamt félögum sínum eftir 5-1 sigur gegn Newcastle í ensku úrvalsdeildinni.

Gerrard lenti þá í útistöðum við Marcus nokkurn McGee sem hafði tekið að sér að vera plötusnúður á staðnum og neitaði enska landsliðsmanninum um að taka við stjórninni yfir lagavali staðarins. Samkvæmt BBC fréttastofunni viðurkenndi Gerrard í samtölum sínum við lögreglu að hafa reynt að lemja McGee þrisvar sinnum en aðeins eitt högg hafi hitt og að hann hefði lamið plötusnúðinn í sjálfsvörn. McGee missti tönn í slagsmálunum.