Viktor Unnar skrifaði undir hjá Val

Valsmenn tilkynntu í dag að Viktor Unnar Illugason hefði gengið formlega frá samningi við félagið, en tilkynnt var að hann gengi í raðir Valsmanna í síðasta mánuði.

Viktor var samningsbundinn Reading á Englandi en fékk sig lausan frá samningi og fór því á frjálsri sölu til Valsmanna að eigin ósk.

Viktor er 18 ára gamall framherji og hóf feril sinn í Landsbankadeildinni með Breiðablik árið 2006. Hann skrifaði undir tveggja ára samning við Valsmenn og er sjötti leikmaðurinn sem Hlíðarendafélagið krækir í fyrir átökin á næstu leiktíð.

Þegar höfðu þeir Ólafur Páll Snorrason og Pétur Markan frjá Fjölni, Ian Jeffs hjá Fylki, Reynir Leósson frá Fram og Haraldur Björnsson frá Hearts gert samninga við Valsmenn.